Recital poético sobre Anne Carson en los Premios Princesa de Asturias 2020. / Foto: Iván Martínez (Fundación Princesa de Asturias)

Anne Carson, Premiu Princesa d’Asturies de les Lletres 2020, ta considerada una les meyores esponentes d’anguaño de la lliteratura anglosaxona y candidata recurrente al Premiu Nobel. Ye esperta en lliteratura griega clásica y poetisa. Afayó el gustu pola poesía al traviés de Safo y declárase una gran almiradora de les hermanes Brontë, sobre too, d’Emily cola que s’identifica enforma. Paezme una escritora talentosa, con una retranca bien fina anque, tamién, ye bien dura. Asina en La guapura del home: un ensayu narrativu en 29 tangos diz coses como “Mirándolo bien, el mio home yera un home que sabía más de la batalla de Borodin que del cuerpu de la so muyer, ¡muncho más!”. Pos resulta que Carson nun vieno a recoyer el premiu, nun sé si foi pola pandemia o porque nun-y dio la gana y, de xuru, que préstame pensar que ye polo segundo.

Carson ye la octava muyer premiada y séptimu Premiu de les Lletres nestes 40 ediciones que lleven otorgándose los premios. Les otres premiaes fueron: Carmen Martín Gaite ex aequo con José Ángel Valente nel 1988; Doris Lessing nel 2001; Fatema Mernissi y Susang Sontang nel 2003; Nélida Piñón nel 2005; Margaret Altwood nel 2008 y Siri Hustvedt nel 2019. Ocho muyeres premiaes por 36 homes premiaos supón el 18% del total los galardones de Lletres concedíos en 40 años.

Per otru llau, según una llamadora estadística del ‘Barómetru de vezos de llectura y compra de llibros n’España en 2019’ fecha pola Federación de Gremios d’Editores d’España’l porcentaxe de muyeres llectores algamen el 68,3% la población española, ente que’l de los homes supón un 56%.

Daqué nun me cuadra cuando confrontio estos datos. Quiciabes ¿ye qué les muyeres lleen, pero nun escriben? Plantegame la dulda de si ye que tenemos un problema cola adquisición del procesu llecto-escritor. O acasu ¿va ser qu’esiste nel panorama editorial, siquier nel clásicu, una nidia predilección pol escritor frente a la escritora? Ya que ellos publiquen el doble -según la información del ISBN de los títulos inscritos, el 61,6% son d’homes y el 32,1% de muyeres- y apaecen nos llibros reseñaos tres veces más que elles. Y ya, ensín entrar en detalle, na chornosa desproporción de xéneru qu’hai nos otros grandes premios lliterarios.

¿Nun sedrá, otra vegada más, la desigualdá estructural del mundu lliterariu onde unos siguen esfrutando mayores y meyores oportunidaes pol simple fechu de pertenecer al xéneru masculín y que a la muyer arrinconasela nel tradicional espaciu del llibru infantil y xuvenil o femenín, esi que les mentes testerones nun consideren seya de la lliteratura de prestixu? (¡Á, si yo vos cuntara de toes eses escritores que tanto y tan bono ficieron por mí!)

En fin, que toes conocemos la repuesta y atristaya ver que tovía temos asina.