Ilustración Amelia Celaya hecha inicialmente para el artículo ‘El asturianu, una lengua herética, antiespañolista y antifascista’.

Dende que enzetemos Pikara Magazine, una d’as apuestas editorials d’o meyo ha estau tratar de publicar contenius en todas as luengas minorizadas d’o Estau español. Imos poquet a poquet. En aragonés encara no emos publicau garra conteniu, pero, as suscriptoras que asinas lo deseyen, pueden eslechir-lo como idioma en o cual quieren que nos comuniquemos con ellas. Agora, grazias a l’alcuerdo de colaborazión que emos feito con Delera, asperamos que a presenzia de l’aragonés en a revista sía bella cosa mayor. Aproveitamos a ocasión ta fer un clamamiento a escritoras que escriben en aragonés: tos queremos más zerqueta! Encara que puedan traduzir-nos bel testo puntualmén, nos intresa publicar contenius produzius en ixe idioma. Andamos buscando tamién bella traza d’alianza d’ixa mena pa empentar a presenzia de l’asturianu en a nuestra publicazión, por zierto.

Delera ye una interpresa espezializada en dar refirme integral a proyeutos que se desarrollan en, por y pa lo meyo rural. A verdat ye que no ye o nuestro causo, pero nos amanemos ta lo suyo proyeuto en conoxer que un d’os suyos obchetivos pasa por empentar l’uso de l’aragonés en o territorio. Seguntes a suya web, “Delera aduya a fer reyalidat as ideyas y proyeutos que surten en o meyo rural, entre os entreprenedors, en as asoziazions de todas menas, en os chiquez conzellos. Femos nuestra ra tuya delera pa fer que plegues más luen, más luego y millor.”

Un idioma en risque

Seguntes os datos replegaus en lenguasdearagon.org, fablareban aragonés unas 25.500 personas anque “os conoxedors d’ista luenga blincareban dica os 56.235 si incluyimos tamién a os que nomás lo entienden”. Una zifra pro más puyata que a que s’ofrexe abitualmén, pero, tal como se replega en iste articlo d’ABC, “no esisten estadisticas esautas y estareba difizil aconsiguir-las, dau o estau d’escomposizión en que autualmén se troba l’aragonés en a mayoría d’as zonas”. En o mesmo articlo aseguran que “lo conoxen, lo emplegan ocasionalmén u lo fablan mui castellanizau” entre 30.000 y 50.000 personas. Seguntes l’Atlas d’as Luengas en Periglo, o risgo que l’aragonés desaparexca ye cada vez mayor.

En ixa linia, zelebramos cualsiquier iniziativa que treballe por preservar a riqueza de l’idioma y nos refirmamos en o nuestro compromís d’empentar a presenzia de todas as luengas minorizadas d’o Estau español en a nuestra publicazión. Ixo sí, tos amenestamos zerqueta pa poder seguir fendo periodismo feminista. Conduze-te. T’asperamos.