Esta imagen se publicó usada en el reportaje ‘Una ola verde por el derecho al aborto en Argentina’. | Foto: MONK Fotografía.

Ya fa bels años que a mía suegra me contó una d’as suyas istorias que fizo que a mía admirazión enta ella se tornase encá más gran. Suya yera una d’ixas istorias que contan as chens d’otras chenerazións, de mullers que marchaban ta Londres pa poder desfer-se d’un fillo que no quereban, por os motius que estasen. Suya eba siu a difizilísima dezisión de no continar entadebán con un preño que no eba demanau. Suya eba siu a valentía de marchar enta un atro pais que no conoixeba, con una luenga que no charraba pas, pa tenir o dreito a dezidir, e no tenir o risgo de morir n’o camín.

No ye una istoria que sepa tot o mundo, más bien ye bella cosa que nomás conta a la chen de confianza porque le fa un poquet de vergüeña, anque ella diz que mai s’ha arrepentiu d’aber preso ista dezisión. Cuan querió contar-me-la, yo escuitaba cada detalle d’a suya istoria, y n’a mía cabeza apareixeban imachens en blanco y negro u en color sepia, traitas d’unatro tiempo a ista parti.

Ista no ye que unatra vivenzia d’as que se repiten n’o món toz os días. A mía suegra podió permitir-se un viache que probablemén en ixos años le salvó a vida, pero bi ha mullers en belatros paises que no ha teniu tan de suerte. A mía chenerazión a vegadas tenimos a idea de que bels dreitos son perennes e mai no pensamos que se perderán, pero no fa falta más que mirar a lo nuestro arredol e veyer como o dreito al alborto, que pareixeba inamobible, ye en contina discusión.

Manimenos, que o dreito a l’alborto siga ilegal, no quiere pas dizir que vaiga a dixar d’aber albortos, sino que istos dixarán d’estar seguros. A la practica isto supone que as personas que puedan permitir podrán viachar ta puestos do siga legal, y podrán albortar de forma segura y guarenziada. D’atra man, aquellas personas que no tiengan recursos pero que no quieran seguir adebán con o suyo preño, abrán d’albortar en puestos clandestinos, metendo en risgo a suya vida por medio de metodos que no guarenzian uns minimos. Como pasa a ormino, os problemas d’ista proibizión son más greus con as mullers que menos recursos tienen. Asinas pues, no ye nomás un problema de masclismo, sino que tiene consecuenzias totalmén diferens seguntes a clase sozial d’as personas implicadas.

Y tornan a apareixer unatra vegada as mesmas preguntas de siempre: por qué importa más una vida que agún no esiste, que la d’a persona que ya siente y padexe, y ye a dueña d’ista dezisión? Cómo imos a abanzar, si a dos por tres emos de tornar a reclamar lo poquito que ya ebanos ganau? Por qué emos d’estar torna que te tornaré convenzendo a la soziedat de dreitos tan basicos?

A vegadas pareixe que cada vegada siamos más amán d’un pasau de color sepia que no abría de tornar.

Leyer más: