Rosa Pérez

Podo comprobar que hai moito medo á palabra feminismo. Os estereotipos, os prexuízos e a ignorancia son moi fortes. Toda aquela e aquel que queira un mundo mellor e máis igualitario é feminista e eso debería estar gravado na nosa xenética. Se houbese un xene de xustiza social a explicación a certos comportamentos sería cuestión de ciencia, e podería definirse unha actitude abusiva cara un grupo dicindo: “ah, claro, é que carece do xene da xustiza social” e seguramente, dependendo de se algunha farmacéutica se puidese beneficiar economicamente, investigarían unha forma para remitir ese xene . Pero non, a desigualdade non é cuestión de ciencia, é produto das sociedades e, desgraciadamente, as “farmacéuticas sociais” están en mans do patriarcado que non quere perder os seus privilexios conseguidos a base de someter outros grupos. O comunismo social está máis estigmatizado que o comunismo político-económico: deste último apenas quedan vestixios restantes e do primeiro… creo que nunca existiu, e moito menos nas sociedades modernas. Estamos no século XXI e segue habendo a división social de xénero do Neolítico (que acabou en torno ó 3000 a.c.), pois si que se evolucionou!

O gran problema é que estamos ante un sistema que conseguiu manterse, e aínda o fai, durante miles de anos debido a súa fortaleza. Soubo formar unha rede tan profunda e abundante de partidarios que acabar con el está a ser duro e complicado, ten moitas forzas poderosas ó seu favor: os gobernos, a relixión, a economía… e tamén a unha gran parte da sociedade, pero quero pensar que algo está a cambiar pouco a pouco e a maior loita que se pode facer é en contra da ignorancia, porque como é obvio (ou polo menos debería selo) na base do cambio está a educación. Está demostrado que as sociedades máis educadas (e non me refiro á educación académica) son máis xustas. Porque esa educación social e de convivencia si que debería ser un cromosoma e é precisamente iso o que quere o feminismo, establecer a igualdade no noso ADN social, de aí a miña perplexidade ante a ignorancia de quen quere desprestixiar ese termo.