Mentes escribo esto, hai una perfil del asturtwitter ganando siguidores y repercusión por momentos: Pisapraos n’Asturies (@AsturiesN), una cuenta que recopila reseñes de restauranes, museos y sitios emblemáticos d’Asturies onde los y les visitantes, más que de les virtúes o defectos de lo que critiquen, faen un bon retratu de les sos propies “cualidaes”: desconocimientu, narcisismu, estrechez de mires, falta d’empatía. Les quexes sobre qu’un castru tenga horarios de visita, les duldes sobre l’interés de Santa María del Naranco y mesmamente los llamentos de que la playa de Gulpiyuri seya pequeña y tea enllena xente sacando fotos (les reseñes miserables sobre hostelería daríen pa otru artículu elles soles) son un bon espeyu de lo que ye la sociedá nuestra. Una sociedá onde’l turismu (esto ye: la tierra ayeno)  ye un productu de consumu y como tal tien que tar a gustu del consumidor.

Y esti planteamientu, ¿a quién beneficia? Ye una cosa pa reflexonar. Per un llau, ta la xente del llugar, que cambia unos meses d’actividá y perres a cambiu de ver so vida empantanada por les riaes de forasteros, que faen que dir a la villa a los recaos llegue a ser la odisea d’ una mañana entera (imaxino’l horror de tener que llevar persones mayores o enfermes al médicu a Llanes n’agostu) y que seya una quimera topar un alquiler razonable pa tol añu, ensin el famosu “de setiembre a xunu” (pa la temporada nin falamos).

Per otru llau ta la xente que viaxa, qu’a toles persones nos gusta: cambiar d’aires, conocer y disfrutar d’aquello de lo que nun tenemos. Les asturianes tola vida fuimos “a secar”, esto ye, a buscar el sol, y a diferencia de la racanería estereotípica de  los forasteros n’Asturies (a.k.a. “mediosmenús”), pero igualmente disruptivos y narcisistes, el grandonismu mineru nos ochenta tomaba por asaltu los pueblos llioneses. Güei, hasta la xente más consciente y respetuoso busca unos díes y un destín pa marchar,  resignándose dacuando a pagar primaes, a ver les coses que vienen na guía y apuntando’l triunfu cuando nun se ve xente como tu nel chigre.

Nestes atopábame yo hai unos díes, del otru llau de la sebe, pasando una selmana pel Mediterraneu, y sorprendida de qu’al pie de cualquier hotel de playa, por aparente y bien puestu que fuere, se ficiere notar l’olor a agües fecales. Coses del desarrollu turísticu, igual podía pensase que los d’ellí nun lo notaben por tar avezaos, pero entós, ¿cómo ye qu’esa xente tan fino yera quien a tar tranquilamente tomando cócteles echaos n’hamaques de llinu finísimo y blanquísimo, con aquellos fedores que tan poco casen col luxu y la distinción? Una amiga a la que-y lo contaba apurrióme la clave: porque eso nun sal nes fotos.